國家領導人趁香港回歸十五周年訪港，剛卸任嘅貪曾理應事前做好相關安排，但可惜喺派發活動入場證件過程搞到亂晒龍，令參加回歸活動嘅地區人士及區議員怨聲載道。事件經本報尋日揭露後，前臨時立法會議員王紹爾主動致電本報，自稱係受害者，仲慘變「無證人士」，依家望天打卦都唔知有無得參加回歸活動，成件事認真諷刺。
王紹爾批評，當局今次派發活動入場證件嘅安排「極之混亂」，原本喺六月初已派邀請函叫大家回覆係咪出席回歸活動，點知到六月下旬，當局又重複同樣步驟，最諷刺嘅係過咗回覆日期先收到封信件，搞到佢事後三番四次向有關政府部門交涉，但一直都未有明確答覆係咪可以出席活動。
雖然突然成為「無證人士」，但王紹爾話，基於出席回歸活動係佢嘅權利，所以佢仍然會到活動現場試下入唔入到場喎，難怪佢都自嘲好似「大肚婆等生仔」咁款！