政情：蔡加敏力撐男人侍產假
「玩具大王」蔡志明嘅愛女蔡加敏（Carmen），早年下嫁佳寧娜飲食集團太子爺馬鴻銘後，先後誕下寶貝女靄翹及一對孖仔，佗ＢＢ經驗可謂十分豐富。日前佢出席一個活動時除咗分享懷孕紓壓心得外，仲話生ＢＢ唔止係女人嘅事，男人都有責任喎，所以好贊成政府就男士侍產假立法，等男士們多啲時間照顧太太。
Carmen話，當年佢懷孕時，雖然老公工作好忙，但仍然好關心佢，但除咗另一半嘅支持外，其實自己心態上都要作出調整，要諒解老公工作繁重同應酬。佢仲話，如果真係有煩惱，千祈唔好收埋，最好嘅解決方法就係同已為人母嘅女性朋友傾訴。
講起四歲嘅大女靄翹，Carmen笑言囡囡終於開始鍾意女仔嘢，依家有學跳芭蕾舞同繪畫，仲參加咗兒童合唱團添，唔知佢囡囡未來會否成為芭蕾舞家或音樂家呢？