政情：馬時亨：畀啲時間新班子
新政府班子今日正式上場，對於外界批評新任命嘅司局長知名度唔高，商務及經濟發展局前局長馬時亨（肥亨）就話，十年前佢入政府時一樣無乜人識佢，所以大家應該畀機會同時間啲司局長，令新政府發揮工作成效。肥亨又贊成分拆商務及經濟發展局，事關佢以前做局長時，由於要兼顧嘅政策範疇甚廣，日日顧住救火，已經再無時間處理長遠大計。
肥亨尋日喺電台節目上又話，日前揭盅嘅司局長名單，被批評欠缺公共管治經驗，佢以過來人身份戥佢哋唔抵，事關新班子喺佢哋所屬嘅領域，都有一定經驗及成就，相信只要有心服務市民及政治魄力，一定可以服務好香港。佢又自嘲當年欠奉政治智慧，撞唔少板，但慢慢磨練出政治智慧，知道如何圓融處事。
肥亨呼籲新班子上任後，應盡快做好內部溝通，加快與公務員隊伍嘅磨合，展現工作能力，令資深公務員信服。咁仲未夠，司局長一定要有政治胸襟，尤其面對立法會議員及傳媒嘅批評，要誠意解釋及溝通，咁日後推動政策時就事半功倍喇！