政情：許曉暉梁鳳儀 冧莊等升官
特首梁振英（CY）嘅政府架構重組方案喺立法會卡住咗，睇怕CY心目中嘅五司十四局理想架構可能要等到年底先有望通過。架構重組失敗，除咗政府運作受影響外，部分一心等上位做新設局長嘅人，隨時可能要待業。不過，政府尋日就率先公布委任民政事務局副局長許曉暉（Florence）同財經事務及庫務局副局長梁鳳儀（Julia）兩個留任，疑似為佢哋升官鋪路。
同憤青對話 唔怕落區
Florence做咗副局長都有幾年，自從盛傳佢會出任新成立嘅文化局局長後，即時惹起各方爭議，但另一方面，佢又搵到唔少文化界中人撐佢，更自稱一直高度參與文化工作。雖然Florence掌管文化政策嘅能力仍有待觀察，但佢肯定係一個親民局長，猶記得當年佢隻身踩入維園同班憤青對話，事後仲請各人飲汽水兼合照，淨係「唔怕落區」呢點，已經合晒要接觸市民嘅要求。
至於Julia獲留任，亦可能為佢將來升官鋪路。坊間一直盛傳，答應留任做財爺嘅鬍鬚曾未必會做夠五年任期，一旦提早離任，極有可能係由新架構通過後嘅財政司副司長陳茂波頂上，而財經事務及庫務局局長陳家強就會擢升做財政司副司長，如果真係咁嘅話，接任陳家強個局長位嘅大熱人選就非Julia莫屬喇。
掌金融發展 表現中等
回顧Julia過去幾年嘅副局長工作，除咗經常落立法會解畫外，據聞唔少涉及中港金融發展同融合嘅工作都係由佢負責，表現算中規中矩，做得唔錯，由佢接任財經事務及庫務局局長，相信反彈不會太大。
其實副局長甄選工作仍在進行中，但政府尋日率先公布兩人嘅任命，證明CY真係好想盡快開展工作，落實自己嘅政綱及治港理念。港人喺貪曾管治七年下已經飽受煎熬，今日貪曾已走，相信會有一番新景象，未來充滿希望。