七年一覺特醜夢，贏得貪曾臭罵名。曾蔭權爵士今日就要滾蛋下台，佢曾經信誓旦旦宣告，會奮鬥到最後一分一秒，結果有冇做到呢？有！不過奮鬥嘅目標唔係福為民開，而係福為權貴高官而開咁解！
港府臨下台公布授勳名單，打開一睇，唔講仲以為係「曾朋友」俱樂部嘅VIP名單，富豪有，權貴又有，高官都有，多數同貪曾有千絲萬縷關係。貪曾舔盡大小便宜，「曾朋友」獲勳就唔大件唔食，大紫荊勳章最正，金紫荊星章唔拘，銀紫荊星章都殺。最離譜嘅係，貪曾被廉署立案調查，居然臨走送個金紫荊畀現任廉署阿頭湯顯明，可能好多人同功夫茶一樣有疑問：唔怪得廉署開咗貪曾快撈咁耐，到依家仲未有下文，唔通當中有蹊蹺？
嗱，貪曾為權貴奮鬥到最後一分一秒，真係達到北大人嘅期許，鞠躬盡瘁，死而後已㗎，臨別秋波，醜聞纏身，仲念念不忘為貪腐集團舔盡最後一滴政治利益。俗語話，太公分豬肉，人人有份，原來貪曾分餅仔，一樣人人有份，不過唔係普通市民人人有份，只係「曾朋友」一個不漏。各位廉潔奉公嘅好市民，唔恨得咁多㗎啦，鬼叫大家既唔係擁有私人飛機及遊艇嘅富豪權貴，亦唔係瞓身保貪護主嘅官僚爪牙咩！
話時話，貪曾將授勳當成利益輸送工具，都唔係一朝一夕嘅事咯。過去七年，年年授勳儀式都幾乎變成「曾朋友」嘅年度聚會，連「三點不露」臭名遠播嘅李國寶都獲頒大紫荊最高殊榮，深圳「禮賓府」嘅大業主又無情情榮升太平紳士。講到呢度，大家終於明白，一個隻手遮天嘅官商同盟利益網絡，就係由一個個紫荊勳章及一個個荷蘭水蓋搭建出來㗎啦，如果話當中冇「曾商勾結」、利益輸送，你信唔信吖！
其實，貪曾將授勳當禮物，向一眾「曾朋友」獻媚，都可以理解嘅。所謂禮尚往來吖嘛，佢成日傍住富豪黐飲黐食，梗係要有所回報，咪利用授勳回禮大宴親朋囉。貪曾集團食相難睇，逃不過市民雪亮嘅雙眼，所以咯喎，貪曾腐敗到最後一刻，佢嘅民望指數亦慘淡到最後一刻。繼港大民調顯示貪曾民望衰收尾，中大民調亦得出同樣結果，逾半數受訪市民直斥貪曾七年表現極其惡劣，衰到連董建華都不如。如果話，「建華之亂」香港人不想回憶，咁「貪曾七年」香港人就係無法忘記。貪曾庸碌無能，無做好呢份工都算，居然仲捲入連串貪腐醜聞，敗壞本港廉潔、法治清譽，所以，香港人永遠唔會忘記佢，一定會同佢算清呢筆七年混帳。
是非功過春秋寫，肅貪正待霧散時。貪曾終於滾蛋落台，佢會唔會好似台灣陳水扁咁嘅下場，就要睇廉署嘞，嗱，千祈唔好放軟手腳吖。總而言之，一路好走喇，貪曾！