颱風杜蘇芮襲港，估唔到除咗令市民無咗「七一」一日假期外，更加搞到每年都舉行七一遊行嘅民間人權陣線（民陣）好頭痕，因為如果打風令遊行被迫取消，佢哋就籌唔到錢，最終令佢哋緊絀嘅財政更雪上加霜。
每年七一遊行，民陣閒閒哋都要用二十幾萬元，加上全年大大小小遊行，使費都幾襟計。由於遊行人流眾多，每年七一遊行就成為民陣籌款嘅主要渠道，好似去年就籌到二十萬元以上，亦係民陣主要嘅經費來源之一，如果今年因為打風而無人參加遊行，對佢哋嚟緊運作肯定有影響。
民陣中人透露，至今已經用咗唔少錢製作紀念品，準備遊行當日出售，加上音響等費用，其實已經使咗唔少錢。除咗民陣之外，唔少政黨團體都會趁七一擺街站籌錢，加上嚟緊九月又到立法會選舉，宣傳使錢好似倒水咁倒，如果七一遊行籌唔到錢，肯定唔少政黨都嗌救命。