政情：李嘉誠撐汕大 出錢出力
孕育唔少莘莘學子嘅汕頭大學（汕大），尋日邁進一個重要新里程，國家教育部、廣東省政府及李嘉誠基金會聯合達成咗一項「三方共建汕大」嘅協議，支持汕大加快發展及繼續發揮高等教育改革「試驗田」作用。李嘉誠仲親身為汕大新行政樓主持開幕，對家鄉嘅教育事業出錢又出力。
發表「我很在乎未來」演講
李嘉誠尋日出席汕大畢業禮時，以「我很在乎未來」為題發表演講，與同學分享成功關鍵。佢話如果世界上有「成功秘方」，最關鍵嘅元素必定係「對成功嘅欲望遠遠大於對失敗嘅恐懼」。佢認為呢個心態能夠激發夢想、銳化觸覺，令人審慎律己、敢愛、敢說實話、敢做「萬綠叢中那點紅」。
至於李嘉誠當年訂立目標，就係「建立自我，追求無我」，希望大家同命運許下承諾，憑仗智慧和勇氣，實現自己嘅夢想及貢獻祖國大地及彼此共存嘅世界。
教育部副部長郝平及廣東省副省長陳雲賢都有出席簽署儀式，佢哋都讚揚李嘉誠多年來對家鄉嘅貢獻，望今次三方合作能為國家栽培更多生力軍。