政情：譚麗芬低調「繼位」食安專員
前食物安全專員陳漢儀今個月中接任衞生署署長，但新任食安專員任命一直未見有公布，但原來衞生署副署長譚麗芬早前已低調轉職食環署「繼位」，再次延續食安專員由女性出任嘅傳統，成為本港第三位女食安專員。之前有傳譚麗芬有機會擢升衞生署署長，雖然依家署長變專員，但至少D3（首長級第三級）變D4（首長級第四級），都叫做升職啦！
曾經借調過去食環署做助理署長嘅譚麗芬，對食環署工作有一定認識，但近排最為人談論嘅，係前衞生署署長林秉恩退休消息傳出後，外界一度流傳新署長屬譚麗芬、陳漢儀與衞生防護中心總監曾浩輝三人之爭，結果陳漢儀跑出，如今譚麗芬接替陳漢儀做食安專員，果真世事難料。據聞做食安專員要見board，即係譚麗芬對呢個位有一定興趣，咁就祝佢新工如意，最緊要係可以令港人食得放心嘛。