政情：回歸騷一鑊粥 辣慶黑英
貪曾早前被本報踢爆，顧住貪威識食而荒廢政事，連回歸十五周年紀念活動都懶得搞，淨係喺網上宣傳就諗住過到骨。經過本報揭露事件後，當局先至做連串宣傳補鑊，但喺派發活動入場證件上又搞到一鑊粥，怨聲載道，事件嘅受害者原來包括前天文台台長林超英（黑英），尋日因為要排隊攞證，連出席自己身兼校董嘅學校畢業禮都要遲到，搞到扯晒火。
話說民政事務局及總署有份負責統籌回歸各項活動，包括今晚特區政府歡迎晚宴及明日七一就職禮，早前透過電郵方式核實地區人士及區議員是否出席活動，點知官方電腦畀黑客入侵，假冒官方發放電郵予地區人士，導致當局未能收到回覆，未有安排相關地區人士出席活動，其後引來受影響嘅地區人士投訴。雖然當局就黑客入侵報警處理，但將事件隱瞞公眾。
累出席畢業禮遲到
為咗唔想將醜事外揚，當局以郵寄方式通知地區人士到所屬地區指定地點索取入場證件，但禍不單行，連郵寄邀請信都延誤，明明講好本月廿七日至廿九日一連三日到指定地點索取入場證，但好多地區人士到廿八日先至收到信件，結果得番尋日最後機會攞證，搞到尋日唔同地點都有成千人大排長龍，其中喺灣仔街市活動中心地庫排隊排到扯晒火嘅正是「黑英」林超英。
原來黑英係天水圍某間學校嘅校董，尋日學校舉行畢業典禮，佢一早約好教育局常秘謝凌潔貞做嘉賓。黑英怒氣沖沖話：「我請人哋嚟，人哋嚟咗我就唔喺度，好唔好意思㗎！」黑英唔想失約於人，惟有同民政處職員講，委任同行嘅一位朋友代佢攞證，跟住就趕去出席畢業典禮。黑英狠批政府安排失當，搞到佢左騰右騰，仲差啲甩底添，叫政府下次無心搞就唔好搞喎！