中環出更：黃進達北望神州 「錢」途無限
海南航空母公司海航集團，早前購入康泰旅行社逾五成嘅控股權，一度令人以為康泰有意淡出旅遊生意。康泰太子爺黃進達（Jason）日前出席一個新書發布活動時，就澄清呢個美麗嘅誤會。Jason強調，家族飲水思源，一定唔會離開老本行，出售部分股權只為進軍內地旅遊業。
剛遊覽新加坡郵輪碼頭
康泰依家喺深圳及廣州各有一間分公司，擴張潛力無限，Jason話，有意喺神州開更多分店，正與內地機構洽談中，如果成事嘅話，相信有助公司開拓內地市場。又係嘅，內地有錢佬以倍數增長，好捨得花錢環遊世界，打開神州之門，「錢」途無限好。聽Jason滿腹大計，話唔定由佢領軍，帶隊喺神州插旗都未定。
除咗中國，新加坡旅遊業近年亦爆紅，Jason啱啱遊覽完當地新落成嘅郵輪碼頭，大開眼界。佢盛讚該碼頭管理完善，空間廣闊，值得香港未來嘅郵輪碼頭借鏡喎。
卓妮