中環出更:為口奔馳

鋼鐵大王龐鼎元孫女龐心怡(Samanta),多年前與大學同學、南區區議員馮仕耕(Fergus)因食而結緣,共同創辦《WOM Guide》食評,兩人經常約埋捐窿捐罅尋找新美食。日前佢哋又去咗中環歌賦街嘅米芝蓮推介食府「On Lot 10」,品嘗正宗嘅法國菜,大快朵頤。

On Lot 10開業三年,唔少名人高官都去過試菜,Samanta同Fergus就話鍾意間餐廳充滿田園風味,食材又夠新鮮,唔少魚類都係向漁夫直接購入。當日兩人叫咗法國家鄉菜血腸配薯蓉、牛面頰肉、清新可口嘅溫泉蛋沙律,再來一味烤小羊肩,肉質彈牙不羶;仲有肉汁豐富鮮味到極嘅「鹽焗魚」。

佗小龍女唔戒口

Samanta爆料話,佢同堂兄、大亞洋酒創辦人龐建貽(Paulo)稱得上係全個家族最為食嘅人,難怪佢身懷八個月龍女都唔戒口。Samanta笑言,懷孕期間好難忍口:「中醫叫我戒食龍蝦,西醫就叫我戒食蟹,於是我食蟹嗰日聽中醫話,食龍蝦嗰日聽西醫話!」但為咗保持靈活,佢都堅持做孕婦瑜伽。

作為專業食評家,Samanta話試食每間食肆前,都要做唔少資料搜集,仲至少要試食兩次,先可以落筆評價。而Fergus為咗保持食評中肯,連討厭嘅食物如味道濃烈嘅納豆,都要吞晒落肚,但後來又慢慢愛上納豆,所以話飲食就係咁奇妙。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報