攞Ａ不離孖兄弟 報父劬勞
【本報訊】就讀何明華會督銀禧中學的孖仔王紹聰與王紹銳，「攞A不離兩兄弟」，兩人雖來自清貧家庭，但正正為了讓勞碌半生養家的父親能享有舒適生活，成了兩人求學的原動力，雙雙在末代高考中奪取佳績。其中哥哥紹聰勇奪4A2C的四優佳績，弟弟紹銳則考獲2A3B1C，即兩優三良。
一齊打波溫書 事半功倍
同為理科生、風紀、排球隊和手球隊隊員，王氏兄弟不但手足情深，亦擁有同一夢想，「我哋打波、食飯、瞓覺同溫書都一齊，因為屋企無錢補習，我哋會互相鼓勵同督促學習，遇有難題就一齊想辦法解決，向住我哋共同嘅理想進發！」兄弟倆在校內手球隊分別擔當左右翼，彈琴時亦會各自用單手去一同演奏。紹聰形容，與弟弟一起做事能相輔相成，更分外安心，事半功倍。
一家五口靠當地盤工人的爸爸維持生計，兩兄弟直言用功讀書的最大動力，是希望父親毋須再日曬雨淋辛勞工作。被記者問及讀書成功之處，紹銳笑指除兄弟間互相扶持外，用功就是取勝關鍵，「我哋唔會偷懶，每一科都會做晒十五年嚟所有嘅試題！」所謂「心有靈犀」，兄弟倆均屬意入讀港大醫科，希望日後可幫助病人。