七年之癢，埋單計數，曾蔭權到底有冇做好呢份工？答案好明顯係你朋友個阿媽「百冇」，而且呢一個被環保團體形容為氣候逃犯嘅痛心特首，晚節不保衰收尾。七年一覺特首夢，贏得貪威識食名，香港終於出咗一個專瞓總統套房嘅「中環民國大總統」，你都咪話唔搞笑。
對於曾蔭權打骰期間嘅環保工作，多個環保團體嘅評分係一致狠批唔合格，以十分為上限，甚至有人評為低得可憐嘅兩分。呢一位曾爵士曾經捋起衫袖振臂高呼「為藍天打氣」，到頭來藍天行動又爛尾。香港人真係好鬼死命苦㗎，睇見貪曾不斷浪費公帑已經谷氣啦，仲要日日呼吸非常污染嘅空氣，名副其實命都短幾年，唔通戴個豬嘴口罩出街咩！
思匯政策研究所發表過一份報告指出，舊年係香港路邊空氣污染最嚴重嘅一年，二氧化氮水平不斷上升，估計曾蔭權上台七年期間，有七千二百四十人因此提早死亡，平均一年冇咗一千條寶貴人命。即係咁，藍天行動爛尾嘅後果好嚴重，貪曾雖不殺路人，路人因貪曾而死，最慘唔可以捉個氣候逃犯去浸豬籠。
講到環保冇做好呢份工，真係一匹布咁長，應該從邊度開始講起呢？嗱嗱嗱，不如從慳電膽事件講起。曾蔭權○九年拋出慳電膽現金券計劃，鼓勵市民棄用傳統鎢絲燈泡，改用比較環保嘅慳電膽。點不知呢一個政壇蠱惑仔真係老謀深算，原來親家老爺係慳電膽大王，慳電膽現金券計劃有明益自己友之嫌，備受輿論抨擊之後，最終亦係爛尾收場。
講到呢度，大家或者會恍然大悟，哦，原來有着數就搞環保，冇着數就懶懶閒，唔怪得七年特首任內冇積極諗辦法為維港上空洗邋遢啦。
計功夫茶話齋，下屆政府將會任重而道遠，事關現屆政府留低嘅環保蘇州屎特別多。更新空氣質素指標？未落實。推出停車熄匙政策？零檢控。更換舊式柴油車？冇誘因。興建焚化爐？被覆核。如果再數落去，呢一匹布就會變咗慈禧太后嗰一條又長又臭嘅紮腳布。
簡單咁講，曾氏蔭庇權貴嘅班子為藍天行動交出一份滿江紅嘅成績表，禮賓府未來主人翁有排都唔得閒。改善空氣質素關乎人命㗎，中文大學研究過，空氣粗微粒濃度愈高，急症入院率相應增加。每立方米增加十個微克，每年因呼吸系統急症入院嘅人數多咗八百三十人，每年因慢性阻塞性肺病入院人數亦增加四百八十二人。
總而言之，氣候逃犯即將拍拍屁股走人，接任者必須攞出《滿江紅》嘅岳飛精神，待從頭，收拾舊山河，朝天闕！