政情：黃靜文談李旺陽變箭靶
政制及內地事務局副局長黃靜文應該唔會留任下屆政府，尋日佢最後一次代局長譚志源出席立法會大會，回應議員就民運人士李旺陽「被自殺」一案嘅質詢，但點知泛民議員個個都問黃靜文知唔知煲呔曾同候任特首梁振英（CY）有冇趁住上京向北京反映港人訴求，慘成箭靶嘅黃靜文惟有楚楚可憐咁話自己真係乜嘢都唔知。
議員提咗一堆關於李旺陽離奇死亡嘅問題，黃靜文尋日重複得最多嘅就係「我真係無資料可以提供」同「我唔知道特首嘅諗法，我唔可以代佢答」兩句。佢話煲呔曾同CY已經分別向北京反映港人對呢件事嘅關注，佢無進一步資料可以提供。黃靜文又話，雖然當局事前有就質詢同特首辦同候任特首辦溝道，但佢根本唔知道案件嘅調查情況，又話自己唔知煲呔曾喺北京嘅行程，但佢就相信內地政府會對外公布調查結果喎。
黃靜文做咗夾心人，其實議員都明白佢嘅情況。仲有三日就任滿，今次經歷對佢嚟講應該都幾難忘。