政情：鄧國斌暗示查貪曾受壓？
將會喺七一後退休嘅現任審計署長鄧國斌尋日接受電台訪問，寄語繼任人唔好受政治影響，即使審計署長係向特首負責，亦要企硬唔搞政治，又重申佢臨走前炮製嗰份煲呔曾瘋狂外訪報告中肯平衡，唔係特登針對任何人。
鄧國斌話，喺八年審計署長任期當中，特首從無指示佢要調查某一政府部門或公營機構，唯一一次指明要調查嘅，就係貪曾嘅外訪住宿開支，講到貪曾好似好公正，好尊重審計署長嘅獨立地位咁。但其後佢又話鋒一轉，指做審計署長肯定會得罪人，被調查同批評嘅部門同官員難免會耿耿於懷，唔通佢係講緊貪曾？
對於外訪報告發表後加重咗貪曾嘅下台壓力，鄧國斌否認有意對任何人製造「殺傷力」，認為報告已做到中肯同平衡，佢都無辦法控制傳媒同市民點樣解讀份報告。佢強調審計署嘅工作唔係「挖瘡疤」，而係幫受查部門「驗身」，又指任何公職人員都需要接受「陽光測試」，做任何事都要「見得光」，能夠向公眾交代解釋。貪曾真係要聽清楚喇！