政情：方潤華來函籲關注糖尿
糖尿病近年成為都市主要疾病之一，仲有年輕化嘅趨勢。一向樂善好施嘅協成行集團主席方潤華都話好關注呢個問題，佢仲親筆寫信嚟本報，話自己早前睇完本報報道有關糖尿病嘅文章之後，有感而發，希望本報做多啲預防糖尿病嘅宣傳，仲呼籲富商要多做善事添！
方潤華喺信中提到，香港每一百家人入面，就有十家嘅屋企人患有都市病，衞生部門必須加強推行預防教育及宣傳工作，盡量減少市民患病嘅機會喎。佢仲話，香港及內地嘅富豪，應該為普羅市民嘅健康出一分力，將賺到嘅錢回饋社會，共襄善舉咁話。
方潤華本身亦係大慈善家，分別擔任方樹福堂基金主席、方潤華基金主席、培華教育基金會委員等，睇到佢筆迹強而有力，言之有物，足以證明佢身體強壯如牛，真係善有善報。