政情：佳叔臨別踩貪曾遮醜
貪曾任期倒數餘下三日，親信要劃清界線真係要趁早。○二年被「行政吸納政治」，咁就吸咗入中央政策組，自此喺時事評論界接近消音嘅中策組首席顧問劉兆佳，尋日接受電台訪問就不忘馬後炮咁話，自己幾年前一早就提出，政府要加把勁加大房屋同福利政策，又喺訪問中點評政府未夠政客化，至今仍未能回應民粹訴求，一面講到自己好似壯志未酬咁，又暗插貪曾無聽佢意見。
中策組如果善加利用，就係特區政府做調查研究嘅後盾，否則就又做唔到嘢又嘥錢，劉兆佳尋日為自己解釋，話其實佢幾年前已經意識到政府要加把勁做房屋同福利政策，例如增加撥地等等，但適逢金融海嘯，政府主張走小心謹慎嘅路線，所以無吸納到佢嘅意見，搞到政策同市民期望又落差囉，加上樓價持續高企，高官又屢爆醜聞，所以民怨咪不斷升溫囉﹗
至於佢究竟提出過乜嘢建議，劉兆佳就話政府內部討論唔公開得，不過佢就力數中策組功績，包括提出人稱「六大慘業」嘅六大產業同優化退休保障三大支柱喎。但講到一啲公認失敗嘅政策，例如問責制，劉兆佳就話只係執行上嘅問題。總之，一切佢都意識過、預示過、提出過，至於執行不善如此種種，負責喺象牙塔齋坐嘅佢都唔想﹗
唔敢再估七一遊行人數
劉兆佳又好自豪咁話，佢任內最滿意嘅工作可謂成功將中策組轉型至政黨研究單位嘅雛形，而中策組做嘅研究數量同影響力更可謂係全港智庫中最多最大。之不過，呢個雛形「民調機構」係用公帑浸大嘅，可以成功單挑民間智庫又有幾出奇喎﹗
不過，即使政策失誤可以賴落政府執行不力，一啲自己嘅過失又好難劃清界線嘅，就好似佢上年回應史上最廢預算案時鬼拍後尾枕，話香港已陷「臨界點」咁，不過劉兆佳尋日就「解釋」話，佢字典真係無「臨界點」呢三個字，或者佢係睇得內地著作太多，搞到呢三個字入咗佢潛意識都唔知啩。
其實劉兆佳另一為人「津津樂道」嘅事迹仲有○三年「意識」到七一只會有三萬人上街，點知當年就有五十萬人上街，尋日再有傳媒叫佢再估計七一遊行人數，今次佢就醒啲喇，無講具體數字，只係話人數應該會比去年多﹗