中環出更：旅港天書化解兩地矛盾
個人遊帶旺香港經濟，但中港文化矛盾多，小誤會往往變成大新聞。城中一班富二代近日搞咗本《來港旅遊小百科》，圖文並茂介紹香江風土人情、旅遊小貼士等，遲啲喺各個口岸免費派畀內地來港旅客。
施榮忻被冒設天仙局
由香港六大青年團體合辦嘅旅遊天書尋日面世，一眾籌委會顧問包括菁英會主席洪為民、百仁基金主席施榮忻（Jaime）、潮商青委主任陳光明（Johnny）、廣東社團總會青委主任黃進達、福建社團青委常務副主任黃楚恒以及惠州新動力主席樓家強齊齊現身。百物騰貴，印二十萬本天書，富二代們夾咗四十五萬元，可謂出錢又出力。
世途險惡，出門旅行、公幹，要打醒十二分精神。Jaime大爆近日有人借佢同二哥、廠商會會長施榮懷名義行騙，誘騙佢哋嘅內地朋友來港相聚，然後設下天仙賭局，有人因此輸掉四十多萬港元。Jaime呼籲身邊好友提高警覺，如有任何懷疑，直接打畀佢查詢喎。Johnny都嘆常收到內地「借錢黨」電話，扮老友問佢借數千至三十萬港元不等，幸好佢醒目，從未上當。