中環出更：仁愛慈善夜重溫經典金曲
麗花皇宮，六十年代的經典。仁愛堂日前舉行名人名曲慈善演唱會，一眾董事局成員重演經典，為蔡黃玲玲教育基金籌款。主席黃達東（Dennis）號召力強，帶領一班兄弟姊妹齊泵水，輕易籌得三百多萬元。基金創辦人蔡黃玲玲大開金口，一曲《不了情》勇奪最佳籌款獎。
陳鄭玉而變身Pink Lady
懷舊氣氛下，Dennis憶起艱苦回憶。當年住板間房嘅佢，雖然過住嗌樓下閂水喉嘅日子，但個個勤奮上進，鄰里關係好，人情味十足。
行政會議成員梁智鴻當晚擔任主禮嘉賓，仲帶病上陣獻唱《獅子山下》籌款，佢話為善最樂，幾辛苦都冇計。副主席陳鄭玉而一身粉紅佳人打扮，奪得最佳服裝獎，佢話條裙係度身訂造，而粉紅色就令佢諗起《我和春天有個約會》喎！另一副主席李愛平身穿Harvey Nichols白色晚裝赴會，佢話當年愛穿超短迷你裙。
總理羅台秦身兼中華廠商會婦委成員，佢孖住廠商會副會長李秀恆嘅千金李楚洳（Samantha）撐場。Samantha天生好歌喉，又鍾意畫畫，原來藝術天分係遺傳自爸爸。佢大爆爸爸係攝影發燒友，經常為影靚相而四圍飛。嚟緊兩父女將會合辦攝影畫展，擦出新火花。
卓妮仲見到總理張瑋傑（Ricky）拖埋太太Isabella及大女Tisha湊熱鬧。Ricky近日再添龍仔，舉家開心到飛起，已有兩個女嘅佢笑言，太太話要停產，專心湊仔喎。
卓妮