爛爛爛，蔭權七年確係好鬼爛，尤其係失敗透頂嘅房屋政策，爛到直接將窮苦大眾踢入劏房嘅非人生活。家陣全香港有十萬個劏房單位，一個唔覺意又火燭又塌樓，唔知再搞出幾多條人命。
好嘞，輿論壓力終於迫使曾蔭權改變姿態，由硬頸拒建居屋變咗跪低復建居屋，你以為守得雲開見月明，居者真係有其屋咩？錯錯錯，改變姿態即係變態咁解，變態嘅貪曾唔知係敷衍定係靠害，復建居屋竟然缺乏全盤周詳計劃，求求其其撥出一塊爛地皮，害到房屋政策呢一個爛攤子爛上加爛！
爛地皮位於元朗宏業西街，地質遠較預期複雜，而且地下有溶洞。由於地質實在超爛，房屋署必須聘請外國專家設計樁柱，引入如同雙體船嘅新式浮樁設計，樓宇高度有必要由原本三十層大幅削減至十層，咁先至符合安全水平，建屋量由原先三百個單位銳減至僅得二百零七個。複雜嘅工程令到建築成本大增至三億六千幾萬元，每個單位建築成本一百七十幾萬，以新居屋單位平均售價一百五十萬元計算，元朗宏業西街居屋不但隨時蝕大本，亦有機會成為賣剩蔗。
喂，特區政府身為香港第一大地主，功夫茶點都唔信冇一塊似樣嘅地皮撥作興建居屋之用。正如公屋聯會主席王坤話齋，煲呔曾舊年匆匆宣布復建居屋，首批全部蚊型地，要插針式加建，佢話：「我就唔信政府真係冇地！」王坤炮轟曾蔭權根本冇誠意復建居屋，敷衍了事將爛攤子留畀下一屆政府。
講來講去都係呢一個「痛心特首」累事，鬼叫居屋用家唔係富豪咩，照顧蝸居一族又唔會有乜便宜可舔，冇得搭超級遊艇同私人飛機，當然唔會肉緊啦。房屋政策向地產商傾斜就唔同嘞，富豪賺大錢咯喎，「曾商勾結」自然為所欲為。
所以話啫，香港回歸十五年以來一直揀錯特首，而且由無能折墮到貪腐。不過從另一個角度嚟睇，一次又一次揀錯特首都冇導致香港變番一條鳥不生蛋嘅小漁村，所以未來特首到底有能定係無能，問題都不大。
點都好啦，再過幾日就係政府換屆，房屋政策呢個爛攤子點都唔會一夜之間變番好攤子，咁就麻煩下屆政府醒醒定定，飾演一個爛攤子維修工程師。功夫茶衷心希望，草根階層唔使再住劏房，上樓住公屋又好，買番間居屋都好，起碼有一個唔驚火燒後欄嘅安樂窩吖嘛。
嗱，貪曾即將成為歷史，禍港殃民最好到此為止，最低限度天橋底嘅流浪漢有覺好瞓，唔好餐餐以洗街為名趕盡殺絕吖，好冇陰功o架！