探射燈：北區媽媽怒問點解福利不保
內地港童湧港搶資源，本地家庭深受其害，北區更是重災區。「撲完床位，又要爭學位，究竟要狼狽到幾時？」家住北區的劉女士去年三月誕下女兒，之後竟是噩夢連場，「入去粉嶺健康院真係嚇死你，周圍啲人都講普通話，連姑娘嗌咪都要講普通話。地方咁窄，次次去到都好似罰企，BB車要匿埋一角。佢哋（內地港童）仲要四處屙尿，櫈上有食物碎。」雖然她有經濟能力轉去私家診所做檢查，但慨嘆：「點解港人唔可以享有應有的福利呢？」
醫療福利被掠奪外，連教育資源也不保。劉女士說︰「好擔心連幼稚園學位都要爭，唔想小朋友跨區讀書咁辛苦，我報咗七間幼稚園學前班，之後仲會報多幾間。」她明言，內地家庭教育與香港不同，憂慮女兒沾染陋習，若幼稚園有內地港童，必定轉校。
普通話響遍健康院
粉嶺母嬰健康院的雙非嬰比例全港最高，早已逼爆，今年雖擴建提供全日兒童健康檢查的樓層，但擠迫無改善，BB喊聲及普通話響遍全層，走廊堆滿BB車，更有人隨手取熱水壺壺蓋載熱水「坐熱」奶樽，健康服務助理做到「躁底」指罵：「知唔知好唔衞生o架！」
本地媽媽梁太說︰「喺公院生BB，遇到內地孕婦衝急症室產子，已搞到我要呆等！依家BB滿一歲嚟健康院打針，逼到行唔到，唔覺得健康院擴充後做到分流喎，一樣咁逼！根本醫療、教育配套一路冇做過嘢！嚟緊仲要驚北區學位爭崩頭！除非下屆政府做好配套，否則我唔打算再生多個！」