政情：李少光怕日日對住老婆
近日好多唔會留任下屆政府嘅高官都忽然變得豁然開朗，尋日再有一例，佢就係保安局局長李少光。光哥尋日喺中環香港會會所食完午飯出嚟，平時唔多嘢講嘅佢忽然變得好健談，仲分享自己嘅退休旅遊大計，話七月中會去加拿大三星期，先會去溫哥華探親，緊接去埋有「牛仔城」之稱嘅卡加利（Calgary）觀光，如果有時間仲會落埋美國玩吓添！
聽落光哥嘅退休生活都幾悠閒吖，但佢就笑言，其實有啲怕退休後日日對住老婆，所以會四出搵嘢做，例如專注做教會事工，咁就唔使日日困喺屋企啦！不過，光哥就話唔會去讀神學，亦唔會做公職，咁唔知佢除咗返教會之外，仲會做咩呢？答案就係湊孫。當大家見到光哥講起孫女嘅甜樣，就會明白咩叫做「有孫萬事足」喇，事實上湊孫確係一種樂趣。