新一屆特區新班子名單疑似明日公布，盛傳擔任食物及衞生局局長嘅骨科醫生高永文近日已提早開工，分別透過去醫院及不同場合同前線醫生見面，向佢哋收定料，預備上任之後，計劃未來五年嘅鴻圖大計。高醫生尋日就去咗屯門醫院，同前線醫生見面，由於新班子未正式任命，所以佢只係話去探同學喎。
據聞屯門醫院醫生日前收到電郵通知，話高醫生尋日會到訪，所以引來最少有十幾廿個醫生到場見佢，好多醫生都向佢反映醫生工時長，工作量大，又有外科醫生話手術設施唔夠等。高醫生話，好關注醫生唔夠休息時間，希望日後可以先處理呢個問題喎。除前線醫生外，醫院多個部門主管都望佢上任後，能夠幫吓屯門居民解決醫療問題。
高醫生最近周圍去見醫生，可能唔只屯門醫院一間，但佢仲未係局長，只能用探同學方式收料。佢話喺屯門醫院有四個醫生係佢同學，只係約埋去醫院傾吓偈。究竟佢係咪局長真命天子，好快就知喇。