政情：孫公臨別插黑英眼光窄
過多幾日就正式退休嘅教育局局長孫明揚，縱橫官場幾十年，出咗名係拆彈專家，五年前佢接替四處辣火頭嘅李國章，理順教育界入面一個又一個火頭。尋日一班教育版記者就送咗張心意卡畀孫公留念，仲幫孫公改圖變身成拆彈專家，咁多年嘅拆彈功績一目了然。
孫公話任內最艱巨嘅，係要同教育界就中學減班達成共識，講到呢度佢都忍唔住要呻幾句，話最初只有廿幾間學校肯參加，佢於是要逐個區、逐間學校去游說，講到口水乾埋終於搞掂，但點知失驚無神殺出英皇書院呢個「程咬金」。孫公批評英皇舊生、前天文台台長林超英眼光狹窄，淨係以中西區角度出發，無諗過全港嘅利益，佢做得局長自然要以大局為重咁話。
至於大批雙非學童來港爭學額問題，孫公話幾年前根本估計唔到有幾多學生會返香港讀書，唔可以做到好似黃大仙咁有求必應，但佢相信船到橋頭自然直，問題最終可以解決。