政情：任命公布 黃錦星走漏風聲
雖然新政府架構仲未獲立法會通過，但新政府班子七月總要上場，環境局局長頂頭大熱黃錦星（KS），尋日就說漏了嘴，暗示明日會有任命公布。話說KS上任局長前最後一件傑作，就係由政府與建造業議會合作發展嘅「零碳天地」，尋日開幕，唔少記者諗住問吓KS對於候任特首梁振英大宅僭建嘅睇法，KS爽快答應，話喺活動後再講。
點知活動後到記者真係問KS有關問題時卻大受阻撓，除咗大會公關話KS唔會回應活動以外嘅其他問題外，又遭建造業議會主席李承仕擋駕，話呢啲問題唔適合呢個場合提問喎。當講到涉及公眾利益問題時，職員先至話由KS自己決定答唔答喎。最後KS都係反口唔答僭建問題，笑笑口咁話：「我知呢個係大家關心問題，星期四我會回應！」
點解要喺星期四回應呢？難道係新班子名單公布？KS就依然保持微笑話：「大家都明白發生乜事。」之後就隨大會人員離開。見到KS尋日心情大靚，除咗係作品得到認同外，相信都係同局長身份就快明確有關。