政情：貪曾甜湯「短聚」惹疑竇
本報尋日頭版報道踢爆正被廉政公署調查嘅貪曾，前日不避嫌喺禮賓府密會廉政專員湯顯明（甜湯），懷疑貪曾想甜湯調查候任特首梁振英大宅僭建事件，點知報道一出街，特首辦同甜湯先後急急為事件解畫。雖然特首辦同廉署統一口徑話貪曾請食飯歡送甜湯，但據本報記者前日喺禮賓府嘅現場直擊，兩人只係會面咗半個鐘，一餐飯只食半個鐘，呢個大話真係搵鬼信。
發晦氣話好多辦法密會
特首辦同廉署尋日先後為貪曾同甜湯密會一事解畫，但最「此地無銀」嘅係甜湯，尋日中午突然通知傳媒下午要同傳媒聚一聚，正當大家以為甜湯想離任前臨別贈言，點知完全係兩回事，原來甜湯大部分時間都係解釋佢前日去禮賓府搵貪曾食飯嘅經過，然後再數吓自己喺廉署嘅工作，只係借個場合去為密會解畫。
甜湯話，前日只係應邀去禮賓府食飯，根本唔需要避嫌，仲好似發晦氣咁話，如果特首要同廉政專員密會，都會有好多辦法喎。不過，佢之後又再兜番，重申當日飯局無任何涉及案件嘅討論，然後又「教育」傳媒，重申廉政專員只會跟進案件進度，至於調查則由執行處負責。
貪曾唔知醜 相比鐵娘子
前日甜湯只喺禮賓府逗留咗半個鐘，食餐飯非常趕急，但如果甜湯只係去收貪曾一個柯打，半個鐘時間又綽綽有餘噃！所以話，甜湯去食半個鐘頭感謝飯局，真係好難令人信服喎，咁啱得咁蹺，民主黨陳樹英尋日就收到廉署通知，廉署話會就梁振英嘅失實聲明展開調查。假如貪曾同甜湯一再堅持大家只係食餐飯，除非佢哋兩個食快餐或o趙漢堡包嘅啫！
講番貪曾，雖然佢個人身在北京出席活動，但尋日仍不忘喺香港「留聲」，佢喺一個電台錄音訪問時，除咗為自己任內嘅拙劣施政辯解外，對自己嘅評價，貪曾一邊扮哽咽咁話要留畀市民評價，但又一邊唔知醜咁以英國前首相戴卓爾夫人及美國前總統克林頓相比，話即使上任時風光，一旦任期稍長，到尾段都有黯然嘅一刻，又話相信港人會客觀定奪喎，真係唔知醜字點寫。