中環出更：唐貝詩瞓身搞團購網站
卓妮有日行過尖沙咀老牌頂好酒家，巧遇名媛寇鴻萍嘅大女唐貝詩（Lydia）食飯，同枱仲有酒家第二代揸弗人兼新派美食家張本立（Billy）。原來Lydia依家全力搞緊媽咪創辦嘅團購網站，當日特登去試頂好自家入口嘅智利Viento Del Sur靚紅酒，密斟遲啲合作推出一蚊一支酒嘅大計。
搵張本立斟合作大計
Lydia話，團購網特色係提供香港實體商戶嘅貨品特賣，所有貨品保證低過市價一半，逢周六凌晨就推出一蚊貨品限量搶購，極受網購一族歡迎。試過一百條英國名牌頸巾，兩分鐘內就被搶購一空添！
Billy都打算加入行動，提供一千支原價一百九十八元嘅靚紅酒，買家只要幫襯任何食物即可獲贈紅酒，確係網站、酒樓及消費者「三贏」嘅好橋。