中環出更：華僑華人總會 吸納青年才俊
華僑華人總會早前喺灣仔會展舉行就職禮，筵開一百五十圍，會上仲宣布成立青年委員會，為總會添加「生力軍」，首屆主席由康業信貸快遞行政總裁李根泰（Steven）擔任，仲有唔少名人二代都加入擔任要職。
卓妮見到Steven同菁英會主席洪為民（Witman）傾到雞啄唔斷，原來佢哋識咗足足有十八年喇！Witman話大家喺海景扶輪社認識，發覺大家有好多相同嘅地方，既係福建同鄉又係印尼華僑，所以特別啱嘴形喎。Steven笑言，彼此見慣見熟，咁多年嚟都唔覺得對方臉上有歲月痕迹。
Steven人脈廣，月前一話要成立青委會，老友們即一呼百應，拍心口應承。一班青委好多都係名人二代，好似馬會大董李國棟公子李民輝、立法會議員林健鋒公子林凱章、全國政協林銘泰公子林智彬、青聯副秘書長詹勝等。Steven話，未來會舉辦多個參觀同探訪活動，以凝聚各地華僑。
黃進達探路搵新景點
康泰旅行社太子爺黃進達（Jason）同青聯副主席彭芷君（Gigi）都去捧場，Jason剛喺月初飛泰國曼谷同新加坡，為公司發掘新景點，希望下半年旺丁又旺財。舉家移居加拿大嘅Gigi就話，最近加入咗愛兒喺當地學校嘅籌委會，下月又要返港忙青聯工作。
卓妮