金鐘地面滿布傷人陷阱
路面陷阱，行人小心！何先生早前途經金鐘花園道纜車站，發現電單車停泊處的地面竟出現「地釘」，「有啲位凸晒啲螺絲出嚟，行過唔知分分鐘連鞋都拮穿，我仲見到有人差啲就畀啲凸出嚟嘅膠戟到添！」何要求相關部門盡快修補，保障行人安全。
路政署發言人解釋，有關膠座為交通圓柱筒的底座，該署在○八年於上址安裝，用以加強提示駕駛者不應將車輛駛入，或停泊於電單車停泊處對外範圍，以免影響電單車進出該停泊處。發言人又稱，該署近期巡查時發現柱筒有損毀，已向供應商訂購物料，並預計於七月完成重置。
「好在早同《東方日報》講，快手通知政府處理，如果唔係又要有意外發生先有人理！」何先生又建議當局應加密巡查，及早糾正有問題設施。