長康商場殘電梯 苦了三萬人

「一樓酒樓、二樓診所、三樓就去屋邨同巴士站，部電梯去親嘅地方日日都好多人出入，壞得咁密真係好麻煩！」長康邨居民李先生曾多次向領匯反映升降機故障問題，惜故障次數仍是有增無減，不滿領匯未有認真處理維修，「試過一個月壞成六、七次，如果傷殘人士坐住輪椅去睇醫生、搭車，冇電梯就要兜多成廿分鐘先去到，仲要日曬雨淋，都咪話唔慘！」

繁忙時間 人貨爭電梯

街坊黎先生則說，長康一期商場設有兩部升降機，其中一部為客貨兩用，平日繁忙時間經常「人貨爭𨋢」，近半年發現故障次數頻密，居民無不怨聲四起，「已經有一部電梯成日用咗嚟運貨同垃圾，唔排得兩、三個字都咪使旨意搭到電梯，仲試過兩部電梯一齊壞，係咪離譜先？」黎先生要求領匯積極處理問題，勿令居民繼續受影響。

其中一部升降機於五月亦曾暫停服務，候電梯人龍高峰期達三、四十人。	升降機故障期間，居民被迫使用樓梯上落，對長者尤為不便。	徐曉杰批評領匯拒為升降機零件作全面更換，漠視居民需要。

領匯發言人承認，兩部升降機於四月下旬一度同時暫停服務以進行緊急維修，需時約半小時。直至五月中旬，由於其中一部升降機需更換機件及進行徹底檢查，故需再次暫停服務，已在五月下旬全面恢復運作，強調期間另一部升降機如常運作。

居民心聲 馬先生：「部電梯啱啱整完一個星期就壞，個個趕返工、返學真係好唔方便！」

居民心聲 張婆婆：「壞電梯最辛苦就係我哋啲老人家，腳痛都要行樓梯買餸，唔食又唔得！」

運作卅年 機件老化

當區區議員徐曉杰直斥領匯未做好保養卻諸多藉口，「藉口多多，上次故障話啲人唔正確使用，其實部電梯都用咗卅年，真係要認真檢查！」徐認為倘升降機「整極都整唔好」，領匯應作全面更換，以居民福祉為首。

「一發現升降機組件有損耗就要即刻換啦，吓吓壞咗先嚟換就唔叫保養！」香港理工大學機械工程學系工程師盧覺強指出，升降機每年須進行一次大型檢查，倘發現組件老化或耗損應及時更換，否則嚴重者會出現斷纜情況，後果可大可小，「最驚都係斷纜嘅啫，可能佢哋恃住部電梯唔會跌落嚟，頂多都係困電梯，咪唔壞唔理囉！」

記者：黃芷君、攝影：陳倩儀