現今不少家長對子女溺愛有加，令港孩現象逐漸蔓延至大學，拔尖制度更進一步令大學醫科生「細路化」！中文大學校長沈祖堯尋日喺電台節目上話，依家由大學選科到就業，不少家長仲「肉緊」過子女，甚至有醫生家長走去問醫院點解個仔成日要返夜更。
雖然醫科屬熱門科目，成績要求甚高，但沈校長就話，依家有啲醫科生嘅衣着言行，好似小妹妹、細路仔咁。佢又語重心長話，醫院病房好複雜，如果病人見到穿白袍嘅醫生，好似細路仔咁，會好唔放心，所以會要求醫科生着得整齊啲，更加唔好跳跳紮，走來走去。
原來沈校長個大女都係中大醫科生，佢直言無參與女兒嘅考試和評估，而咁耐只係同個女上過一次課，但返到屋企都會做「醫生爸爸」，對女兒嘅提問都盡量有問必答。由於平時忙於工作，所以亦希望盡量抽空陪伴家人，以「質素」代替「數量」咁話。