睹恐怖碎骨 住客續搬走
【本報訊】「真係好得人驚！殺咗四個人仲要碎屍，好恐怖！」恐怖連環碎屍案令長豐苑居民惶恐不安，公安連續四日在水渠挖人肉碎蒐證，據目擊的居民憶述，肉碎形狀大小不一，部分黏成肉餅，亦有一塊一塊，甚至連碎骨，居民直言兇案令他們度過一個膽戰心驚的端午節，更有住客不敢久留，陸續搬走，令屋苑單位租價因而下跌。
租價下跌700元
屋苑居民議論紛紛，住客葉太表示：「真係好得人驚！端午節前發生啲咁嘅嘢！過節都過得唔開心！」據悉，一名租客要搬，通知業主，業主查問：「住得好好哋，點解唔住呀？」租客直接告訴他：「嘩！發生命案喎，咁恐怖，仲唔走咩！」據附近地產公司職員表示，受事件影響，屋苑樓盤租價已下跌，月租減少二百至七百元不等。
事實上，長豐苑距離文錦渡口岸只約四百米，故有不少港人業主，單位主要用作出租，由於屋苑毗鄰便是深圳「夜蒲點」春風路，的士高、桑拿浴室、夜總會等夜場林立，因此不少在附近夜店工作的人士均會租住該屋苑。