劏房被形容為港式貧民窟，呢一種咁失禮街坊嘅住屋怪胎，到底係幾時大量湧現嘅呢？到目前又湧現咗幾多出嚟獻世呢？據估計，家陣劏房單位超過十萬個，大量湧現嘅時間剛好就係曾蔭權在位七年期間。
嗱嗱嗱，臨天光瀨到晚節不保嘅煲呔都唔敢否認o架，舊年發表任內最後一份施政報告之前，曾蔭權承認房屋政策有失誤。至於失誤嘅原因，佢就冇講嘞。都啱嘅，文過飾非係人之常情，冇理由話房屋政策失誤嘅原因係自己一味傍實富豪黐飲黐食，所以忽略咗民生需要啫。
失誤嘅原因當事人唔同你講，失誤嘅結果就大家都有眼見。喂，居屋又停建，公屋又減建，私樓價格同租金又係咁起勢升，草根階層望樓興嘆之下，唔住劏房唔通瞓天橋底咩！
所以有人話，曾蔭權治港七年等於亂港七年。七年以來市民收入經過通脹蠶食變咗負增長，整體經濟情況都係原地踏步，惟有劏房數量係正增長，而且增長到超過十萬個單位，你都咪話唔得人驚。
貪腐醜聞一匹布咁長嘅貪曾，自己僭建就叻，縱容權貴僭建都叻，為港人提供安樂窩就差到冇朋友。一場僭建風暴話畀大家知，增加額外空間嘅先決條件係先擁有一個好大嘅空間，最好係獨立屋，僭建天台又得，僭建地庫都得。香港嘅蝸居一族連一個殼都冇，想學高官權貴或者新界鄉紳非法僭建都唔得。富者愈富，貧者愈貧，就係咁解。
貪曾係就係推出一個置安心計劃，頂唔順輿論壓力仲應承復建居屋添，之不過問題係，興建房屋至少要五年，遠水不能救近火。如果你今日嗌肚餓，功夫茶許諾幫你養一隻牛，五年後劏咗隻牛請你食西冷扒，你估你會唔會嬲到七竅生煙吖嗱？
貪曾亂港七年真係搞到市民眼火爆o架，早幾個月之嘛，有傳媒委託香港大學民意研究計劃做咗一項調查，以一百分為滿分，受訪者平均憤怒指標達到四十九點五分。必須特別注意嘅係，調查係曾蔭權被東方報業集團獨家連環踢爆貪腐醜聞前做嘅，如今家陣再做多次調查，憤怒指標有機會爆燈。
講真，普羅百姓有乜可能唔嬲爆？有財有勢嘅權貴住嘅係僭建豪宅，冇人冇物嘅「缺宅男女」被迫蝸居劏房，申請入住公屋遙遙無期，揀凶宅嘅機會都冇，唔嬲嗰個應該唔係人。
簡單咁講，曾蔭權嘅房屋政策唔止失誤，直情係徹底失敗，失敗到佢老哥都唔知自己噏乜。煲呔講過，香港不存在冇瓦遮頭嘅情況。盲嘅都睇到本地存在大量流浪漢啦，唔通天橋底都算有瓦遮頭？
點都好啦，七月一日送瘟神，貪曾唔走冇希望。