貪曾親自演活「如何貪盡呢份好工」，本報日日猛料抖出貪曾臭史，佢連卸任後都要繼續去貪去舔。
貪曾七一任滿落台，可免費使用位於港島半山的前特首辦，佢早已下令相關部門為前特首辦進行超豪裝修，仲要有個可存放二千支紅酒嘅酒窖，消息話貪曾如此豪花公帑，正是為了報被東方報業集團踢爆佢豪住「深圳禮賓府」嘅「補償」！咁都得？
老朽但知「野性難馴」，如今從貪曾嘅一舉一動，又驚覺原來「貪性」一樣難馴。野性之所以難馴，就好比我哋嘅尾椎骨，不論如何進化總會留點痕迹，而這殘存的野蠻，據云帶給吾人極大的快樂，是以「我的野蠻女友、情人、老婆」，男人通常會從痛苦中一一受落！人類未滅種，要多得這「野性難馴」。
老朽認為貪曾似「百足之蟲」，皆因佢連下台都仲要貪，那敢情係「死而不僵」！百足，蟲名，又名馬陸或馬蚿，有十二環節，切斷後仍能蠕動。「百足之蟲，死而不僵」比喻勢家豪族，雖已衰敗，但因勢力大，基礎厚，還不致完全破產。
貪曾呢隻「百足之蟲」，卻是「貪而不僵」；貪曾雖然唔係哲學家，亦唔係二流分析家，絕對係一流貪婪家，佢為貪婪寫下完美的概念，上台下台，只要一息尚存，就要攀到貪嘅頂點，「努力做好份工」嘅意思就係誓要超越貪性難馴嘅局限！今夜星光燦爛，開支天價茅台醒一醒！