政情：葉偉明廁紙筒「方便」市民
九月立法會選舉臨近，各黨派參選人都會向選民派發一啲印有自己嘜頭嘅各類物品做宣傳。近日網上流傳一幅印有工聯會立法會議員葉偉明肖像嘅廁紙筒相片，最初仲以為係有人惡搞，一問之下原來係真嘅。
葉偉明解釋，呢個廁紙筒顯示佢同工聯會真係「急市民所急」，「市民有乜大事、小事，都可以搵我哋幫忙解決」，真係唔怕尷尬同核突喎！
葉偉明嚟緊有意由勞工界功能界別轉戰新界東，面對多名泛民主派同建制派對手，自然要博出位搞搞新意思。佢話呢個廁紙筒整咗已有一段時間，唔係專為選舉而設，整咗幾多個同用咗幾多錢都已經唔記得喎。
問及會否覺得尷尬同核突，葉偉明話其實廁紙筒都唔一定係放喺廁所，擺喺客廳、飯廳用嚟抹吓嘴都得，就算真係有選民用嚟解決大小二事，佢都絕對唔介意，認為咁先證明佢哋幫到市民，真係服咗佢囉。