發展局局長林鄭月娥早排發表終結丁權論，引起新界原居民強烈反彈，雖然事後急補鑊，話只係佢個人諗法，政府從無就呢方面研究，不過直接受影響嘅新界原居民當然唔會罷休，近二十個海外原居民僑領近日去信新界鄉議局主席劉皇發，批評佢太軟弱，唔肯為新界人爭取權益。
呢批僑領話，好多原居民都覺得發叔喺終結丁權呢件事上太過軟弱，做事唔夠硬淨，對政府又處處忍讓，凡此種種令鄉民對發叔有好多怨言。僑領們質問發叔，到底怕啲乜？唔通係怕北京政府，所以寧願犧牲原居民利益，都要阻止佢哋發起大型抗爭行動？
封信仲要求發叔盡早辭去行政會議成員一職，企喺新界人一邊，同政府抗爭到底喎。不過咁，我哋最近收到消息，話發叔對是否留喺行會，有好大猶豫，當中好大部分原因係「私人理由」，如果消息真確的話，佢行會任期得番幾日，辭唔辭職影響都唔大。