政情：雷曼印刷版報告冇人吼
好多人都話立法會淪為口水「垃圾會」，但其實立法會都有佢嘅功能，例如成立專責委員會調查社會關注嘅事件啦，調查完成後仲會出一份報告，供公眾購買，但原來報告嘅定價可平可貴，而且唔一定薄啲就平啲，最主要係視乎印刷量多少，但邊個決定印多定印少，就無一個客觀答案。
我哋最近派咗個格價專員比較吓新鮮出爐嘅研究雷曼兄弟迷債報告，同搞咗好耐嘅梁展文事件報告。發現梁展文報告重一千四百克，厚四百幾頁，都只係賣一百四十八蚊，但新上架嘅雷曼報告，只係得三百六十幾頁，重一千二百幾克，但唔知點解售價係最貴，賣成一百九十八蚊。唔知係咪因為雷曼報告又薄又貴呢？職員同我哋講報告到依家仲未發市。
我哋都問過秘書處對報告嘅定價規定，答案係報告定價係根據佢哋印刷數量而定，即印得愈多賣得愈平。其實呢啲報告全部都有上網，唔需要擁有一本白紙黑字報告嘅市民，上網睇就得嘞。