政情：陳茂波自爆細時英文差
特區政府仲有唔夠一個星期就換屆，候任特首梁振英（CY）近排雖然備受僭建問題困擾，但從佢由一個出身基層嘅普通人搖身一變成為特首，再加上佢喺競選特首時嘅種種經歷，充分體現到不斷打拚嘅獅子山下精神。盛傳會出任副財政司司長嘅立法會議員陳茂波（Paul）同CY一樣都係出身貧窮家庭，細細個已經知道要努力裝備自己，阿Paul仲自爆自己細個英文奇差，但佢不斷努力進修惡補，先捱到今日差一步就可以做到副司長。唔知CY同阿Paul兩人係咪因為成長經歷類似，所以特別啱傾呢？
CY之前喺宣布參選大會上話自己出身貧窮家庭，三姊弟細細個已經要喺屋企幫手做家務，又會幫媽咪穿膠花幫補家計。之後為咗供CY去英國留學，佢嘅屋企人花盡所有積蓄，大家姐仲賣晒啲嫁妝，辛辛苦苦先可以籌足一年學費畀CY去讀書。正因為咁，CY話當時佢喺英國寧願半工讀去中國餐館做兼職賺生活費，都唔想屋企人再畀錢供佢讀書。
搵女友改會議紀錄覺無面
一直全力支持CY參選特首嘅阿Paul尋日接受電台訪問，佢話自己細個住喺石硤尾木屋區，家境同CY一樣咁貧窮，當時佢除咗要接受外界助養外，讀中學時仲要喺製衣廠做雜工幫補家計。阿Paul又話自己當年讀中文中學，原本同其他同學一樣對英文非常抗拒，但出嚟做嘢後先知道英文對事業發展好緊要，於是就特登去夜校進修惡補英文。
阿Paul又憶述自己之後轉咗去建造業訓練局做秘書長兼會計主任，佢話當時要用英文寫會議紀錄，但佢啲英文畀人改完又改，佢惟有硬住頭皮搵喺聖士提反女子中學畢業嘅女朋友、即現任太太幫佢改會議紀錄。阿Paul笑住話當時明明係追緊女仔，但竟然要掉番轉頭請教女朋友，搞到佢覺得自己好無面喎。
未宣布參選前，CY成日被問香港青年愈來愈窮，應該點做。佢好快就上場喇，唔知可唔可以影印多幾個佢同阿Paul呢啲香港故事呢？