中環出更：鄭錦鐘過七日涼浸浸暑假
暑假眨眼到，又係名人外遊旺季。保良局副主席鄭錦鐘（Eric）選擇去阿拉斯加避暑，過涼浸浸夏天。Eric尋日同太太現身馬場，佢透露七月下旬將拉隊由溫哥華啟程，一嘗坐郵輪觀賞北國風光。不過由於公務纏身，「涼浸浸」假期只得七日。
出發前，Eric仲有一件頭痛事。話說出發日期一度撞正一個名人保齡球賽，度咗好耐，Eric決定改機票遷就。咁大犧牲，有原因嘅，原來佢係保齡球迷，中學時已係高手，但投身社會後，已經好少掂嘞。今次比賽，絕對係大顯身手嘅好機會，所以至咁緊張。
李宗德拒絕捱夜睇波
同場仲有足球隊和富大埔班主李宗德夫婦，近排歐國盃打得如火如荼，李宗德都𥄫到實，但就拒絕捱夜睇波。無他，如今資訊發達，上網就睇到最新賽果，又使乜做「貓頭鷹」呢？見李生李太咁恩愛，原來今年係兩人結婚四十周年。兩人當年因留學美國認識，真係千里姻緣一線牽。
轉過頭，卓妮撞見信置太子爺黃永光（Daryl）孖住太太入場。見佢眉頭深鎖，細問之下，原來愛駒「勝利多」日前喺操練期間受傷，極有可能從此退役，提早到澳洲頤養天年，難怪Daryl講起都眼濕濕。
卓妮