工業界立法會議員林大輝之前力挺前政務司司長唐英年參選特首，盛傳廠商會嫌佢「深唐」色彩過於濃厚，諗住換人出戰九月立法會。不過，廠商會會長施榮懷（Irons）就話會支持大輝角逐連任，又話暫時未聽到有高層唔支持大輝喎。如果係咁，盛傳有意挑戰大輝嘅廠商會會董、餐飲聯業協會會長黃家和（Simon），估計最終只能循飲食界出戰。
被問到Simon挑戰大輝一事，Irons就話任何會員都可以參選，但轉頭又話希望廠商會團結一致支持大輝喎，等於唔支持Simon參與遴選。至於一直未決定循飲食界或工業界出選嘅Simon，就似乎想出戰工業界多啲，事關佢話餐飲業多屬本地生意，但工業就國際化得多，而做生意亦要向外睇遠啲，暗示想搶攻工業界議席。
不過，黃家和隨即又話唔少飲食界朋友叫佢出嚟同自由黨張宇人爭奪飲食界議席，所以佢喺短期內會有最後定案，但從Irons高調力挺大輝嚟睇，Simon似乎就只係得番飲食界條路可以行喇。