政情：潘兆平擬接英姐棒
九月立法會選舉功能界別勢必大換班，好似勞工界三個議席都換人，工聯會換兩位新人上場，而港九勞工社團聯會（勞聯）亦決定換人，因為勞聯代表李鳳英（英姐）都做咗三屆議員，所以要搵後輩接棒。最近終於搵到喇，主席潘兆平如無意外會代英姐出戰，但唔知能否繼承到英姐嗰團火呢？
勞聯為咗幫英姐搵接班人，早前已經發信畀各會員，叫佢哋提名心水人選，上星期截止後，只得兩人被會員提名出戰勞工界，分別係主席潘兆平及副主席吳慧儀。但據聞吳慧儀覺得做議員太困身，出戰意欲唔高，所以只得潘兆平出戰。
不過，潘兆平話要到七月初常委會扑錘後，先至決定邊個出選，自己就隨時準備為勞聯出戰。潘兆平係破產欠薪保障基金委員會委員、生產力促進局委員，又曾係勞顧會成員，同官員交手係家常便飯，但身為建制派，佢學唔學到英姐嗰種不畏強權嘅性格，相信要過幾個月至知。