政情：三角糉考起林健鋒
經濟動力尋日趁端午節落區做騷，立法會議員林健鋒（Jeffrey）、「環保博士」邱榮光、恒基地產執行董事孫國林及一眾鄉事派成員齊包糉。Jeffrey自言包糉有一手，但到落場實戰嘅時候，技巧就有待改進喇，反而孫國林係最包得嗰個。
大會宣布開始前，Jeffrey已快人一步拿起糉葉，點知佢包極都唔滿意，仲將隻糉收埋喺後面，然後話：「呢隻唔得，再嚟過！」終於包到第三隻先成功，莫非因為疏於練習？Jeffrey解釋，平時包開長形嘅糉，今次包三角形難度較高喎。佢仲話，受到出缺議案「拉布」戰所累無時間包糉，惟有叫老婆買糉應節。
今次佢哋包嘅係八寶健康素糉，邱榮光教路，包細隻啲，烚糉時更慳爐火更環保。邱博士近日積極考慮參選立法會新界東直選，勢必與建制派陣營搶票，被問到有冇人勸退佢，佢就話目前只係試探吓水溫喎。