政情：甜湯告別宴冷清清
七月政府換屆在即，唔少無得留低或者唔想留低嘅政府官員，都紛紛開茶敍講吓離任感受及總結任內工作。不過，即將離任嘅廉政專員湯顯明（甜湯），據聞佢無打算開茶敍或記者會，淨係肯同內地傳媒做訪問，唔知係咪驚被本港記者追問佢查貪曾查成點呢？甜湯唔搞茶敍，據聞連部門幫佢搞告別派對亦少之又少。
據聞廉署班同事會喺嚟緊星期五下晝，喺廉署總部餐廳幫甜湯搞個告別午宴，但規模就同以往離任嘅專員好唔同。話說以前黎年同黃鴻超離任，都開足六圍枱，但今次甜湯離任，就只有首席調查主任以上人員出席，連埋其他部門，可能坐唔夠三圍枱，場面都算係冷清。
有廉署職員話，可能甜湯唔想班下屬破費，但亦有人話，其實甜湯任內經常去內地、澳門等地開會，啱啱又去完北京，可能佢同內地官員熟啲啩！明晒，咁唔怪得甜湯淨係同內地傳媒做訪問啦！