政情：CY爆僭建 牛鬼蛇神現形抽水
候任特首梁振英（CY）被揭發山頂豪宅有僭建後，即時有班牛鬼蛇神喺四方八面走出來，無論係泛民主派或建制派都撲出嚟說三道四，一時話CY「嚴重疏忽」，又話事件係「政治危機」，仲有人話要拉佢落台添。不過，佢哋好似全部失晒憶咁，對自己或黨友僭建醜聞不聞不問、輕輕放生，如今對CY僭建就喊打喊殺，唔係牛鬼蛇神出嚟「抽水」又係乜呢？
民建聯出名叫「僭建聯」，身為立法會議員嘅張學明、黃容根同陳鑑林，佢哋屋企都有僭建，其中陳鑑林畀人踢爆後仲拆完又起，簡直目無法紀。
至於黃容根同張學明間屋，到依家都未清拆僭建部分，聲稱重建或向當局申報就搞掂。所以該黨立法會主席曾鈺成尋日出嚟批評CY屋企僭建係嚴重疏忽，點解佢又唔插班黨友無法無天呢？
王國興一時唔偷雞做保長
工聯會陳婉嫻亦一樣，尋日出席啟德河綠色藝術節開幕禮時，唔知興奮得滯定係想落河濕吓對腳，企喺道德高地猛批CY以無心之失作解釋實在講唔通喎，聲言要佢解釋清楚。不過，嫻姐個黨友「西鐵男」王國興，早前都畀人踢爆屯門住所僭建玻璃露台，好彩最後拆得快先至冇畀人鬧，估唔到王國興「一時唔偷雞做保長」叫CY解釋外，連嫻姐都抽水鬧埋一份。
至於新民黨主席葉劉淑儀，更狂插公職人員最緊要有誠信，僭建二百呎同唐英年僭建二千呎都係咁衰喎，但佢好似忘記咗黨友史泰祖去年被踢爆上水別墅豪霸八千呎官地嘅事。建制派扮失憶，泛民亦選擇性遺忘。民主黨何俊仁同公民黨梁家傑都話，僭建涉及誠信問題，要求CY上任後即刻辭職。回想當初民主黨黃成智同公民黨湯家驊都被揭發住所有僭建，但點解當時無人叫佢哋辭去議員職務呢？
咁多牛鬼蛇神之中，最衰一定係食物及衞生局局長周一嶽，佢恃住自己無得撈，就不停指指點點，話對CY僭建好失望，又扮晒嘢咁叫CY盡快解釋清楚，否則好可能係一場政治危機。周一鑊上個月先被本報獨家踢爆佢嘅加列山道住所僭建，成個露台都被玻璃嵌板圍封，其身不正都竟然夠膽指摘CY。估唔到呢單僭建風波，就睇穿晒班牛鬼蛇神真面目。