中環出更：田北辰捐10萬畀「老友記」
貪曾治港七年加劇貧富懸殊，因而出現咗好似老友記慈善基金呢類組識，除咗向長者派飯外，仲提供拍照及送贈寒衣。不過礙於經濟環境，募捐善款日見困難，基金前日就喺西港城搞咗個三周年晚宴兼慈善籌款夜。曾經參加過電台節目《窮富翁大作戰》體驗草根生活嘅新民黨副主席田北辰，深切體會長者孤獨無依嘅淒涼處境，於是即場捐出十萬元支持基金。
林榮岳嘆善款縮水
老友記慈善基金執行總幹事林榮岳話，目前環球經濟極之不明朗，以往好慷慨嘅公司或機構都要縮減捐助，令到基金營運大受影響。佢哋原本每星期有五日派送兩餐熱飯畀長者，但迫不得已改為每星期派送三日，而其他服務亦需作調整，佢話呢個係無奈嘅決定，但扶助貧窮老弱嘅意志就絕不動搖喎。佢又話，除咗捐錢外，捐贈衫褲被鋪等物資都可以幫到好多人o架。