中環出更：蔡家總動員 睇龍舟撐加讚
尋日端午節，香港各處都有龍舟競賽，其中沙田城門河嘅賽事，過千市民企喺河邊觀賞扒龍舟，卓妮都有去湊熱鬧。卓妮見到「玩具大王」蔡志明舉家現身，其公司每年都派出「旭日龍舟隊」參賽，公子蔡加讚（Karson）今年更擔任沙田龍舟委員會主席，一家大細食完糉做早餐，就齊齊出發睇龍舟。
Karson擔大旗搞活動，爸爸蔡志明同媽媽蔡李惠莉、家姐蔡加敏與千金Chelsi、加怡及準丈夫Jeremy齊撐場，但就獨欠佢女友汪圓圓。對女友愛護有加嘅Karson解釋話，場地人多又熱，怕女友辛苦喎。
蔡太讚汪圓圓純品
蔡太透露，近日忙到無時停，事關女童軍、婦聯同自己開設嘅幼稚園都舉辦活動。蔡太年尾嫁女，咁有無催促Karson快啲成家立室，令好事成雙呢？蔡太就笑笑口話，自己好民主嘅，阿仔鍾意結咪結囉！佢又大讚汪圓圓心地幾好，最緊要個人純品喎，睇嚟呢杯新抱茶，唔使幾耐就有得飲喇。
卓妮仲見到金至尊數碼行政總裁吳傑莊（Johnny），佢同沙田體育會主席李有全係老友，喺對方穿針引線之下，做咗體育會名譽會長。Johnny笑稱，雖然自己唔係「沙田友」，但周末不時會入沙田做運動。係咩運動呢？咪就係賽馬「運動」囉，又可以做善事，一舉兩得。
卓妮