茅台酒屬公家 理應退還政府

工黨主席李卓人批評曾蔭權「唔係努力到最後一分鐘，而係貪到最後一分鐘」，擔心貪曾面對該批貴價茅台，「咁貴重容易墮落」，應退還政府保管。他又質疑特首辦前日回覆本報時，聲稱該批茅台只作官方用途，只是貪曾被篤爆後的狡辯，否則毋須搬到前特首辦供他專享。

「冇理由自己落袋」

自由黨主席劉健儀亦狠批貪曾：「點會有咁貪小便宜o架？全世界啲首長都唔係咁，以官式身份收，就應該捐畀政府相關部門，冇理由自己落袋！」她要求貪曾公開交代，並羅列其搬往前特首辦的物品中，到底有多少是以特首身份收取的禮品。

市民感不忿 楊小姐（大學生）：「作為高官應該要廉潔，呢個係曾蔭權嘅責任，依家仲畀佢破壞晒香港一路以來嘅廉潔形象！希望下屆政府會好番啲啦。」

陳先生（自由工作者）：「我覺得曾蔭權需要向公眾交代！佢道咗咁多次歉，但一啲補救都無，最起碼都要退番晒啲錢！」

工聯會議員王國興認為如該批茅台屬公職禮品，曾蔭權應作出申報。民主黨副主席劉慧卿亦要求貪曾把該批茅台送返禮賓府，讓下任特首宴請貴賓時使用。