港府搞文化及創意產業眼高手低，經常被人批評目光短淺，政策短視。究竟港產官僚短視成點呢？今日就由視覺藝術學院嘅學生話畀大家知喇。
視藝學院由浸會大學開辦，○五年向政府租借啟德前皇家空軍軍官俱樂部做校舍，大學斥資二千萬元翻新活化，每月再向政府繳付五萬蚊優惠租金。嗱，呢個空軍俱樂部係法定一級古蹟嚟o架，同視藝學院嘅人文氣息可以話襯到絕，所以咯喎，○九年獲聯合國頒授亞太文物古蹟保護獎「榮譽獎」，成為全港四個獲得呢個榮譽嘅保育古蹟之一。
好嘞，既然港府成日口口聲聲話搞文化創意產業，而視藝學院又搞得朝氣勃勃有聲有色，正常嚟講，港府就算唔乘勝追擊，全力發展視覺藝術，都應該繼續支持浸大啩？哈，點知特衰政府真係唔多正常，居然對視藝學院玩加租迫遷。
產業署年初突然通知視藝學院，由九月起新租約改以市值租金計算，每個月租金加到三十萬元！喂，所謂文化創意產業，口號嚟嘅咋，你估搞文化真係豬籠入水呀，一次過加租五倍，咪即係迫遷？睇嚟港府唔止係見錢開眼，仲係畀兩個臭銅錢遮住對眼添！
最離譜嘅係，港府唔止短視，仲係大細超。正如學生話齋，視藝學院被加租趕絕，反觀與「痛心特首」煲呔曾有千絲萬縷關係嘅貴族學校哈羅香港國際學校，只付出象徵式一千蚊，就享用佔地四十萬平方呎、市值達十四億元嘅屯門海景靚地；而外資設計學院薩凡納更加唔使講，獲港府免租批出北九龍裁判處舊址。港府官僚崇洋媚外，簡直同「寧贈友邦，不予家奴」嘅慈禧太后有得揮。
講到崇洋媚外咯喎，曾蔭權爵士簡直係人辦，呢位「第一貪官」飲洋奶長大，就算入主禮賓府，一樣身在漢營心在曹，貪曾治下，港府媚外，又有乜出奇吖。
本港視覺藝術發展長期滯後，同南韓、新加坡以及內地相比，直頭輸足九條街。當局大拿拿斥資二百幾億搞西九文化區，但對本港唯一嘅視藝學院唔支持不特止，仲大幅加租迫遷，趕盡殺絕，咁仲唔係倒行逆施？有立法會議員睇唔過眼，狠批當局一邊搞西九文化區，一邊扼殺培育人才嘅空間，簡直係自相矛盾，思覺失調。
官逼民反，民不得不反。港府近利短視又好，崇洋媚外又好，總之迫遷視藝學院，等如逼學生反枱。學生揚言七月一日將會上街抗議，以十尺大立體藝術作品向公眾展示視藝院被迫遷。計功夫茶話齋，學生不如做多個十尺大立體貪曾公仔，肯定更加有視覺藝術效果呀！