候任特首梁振英嘅山頂大宅被揭發有僭建物，多名泛民主派議員即時化身正義之士輪流抽水，建議喺特首選舉落敗嘅唐英年同民主黨（白鴿黨）主席何俊仁，喺下星期前向選舉事務處提出選舉呈請推翻結果。不過，有心水清嘅政府官員恥笑泛民話，其實四月二日已經係提出選舉呈請嘅最後限期，泛民今次未搞清楚就胡亂抽水，真係自取其辱。
人民力量陳偉業（大舊）尋日鼓勵喺選舉中被揭僭建地下王宮嘅唐唐提出選舉呈請，而白鴿黨李永達就話，唐唐當初就係因為僭建而搞到民望插水，白鴿黨會盡快決定叫唔叫何俊仁提出選舉呈請喎。不過，由於特首選舉涉及大量憲制及法律程序，提出選舉呈請嘅限期只有七日，就算立法會及區議會都只係有三十日呈請限期，並非如泛民所講有三個月限期咁多。
大舊知道抽錯水後惟有以笑遮醜，跟住又無喇喇話會入稟法院要求酌情延長選舉呈請嘅申請喎。不過，大舊都算好，反而李永達就更加唔知醜，知道實情後只係回應話：「係咩！」跟住行咗去就算。