政情：陸宏廣豪言食硬何鍾泰
現任工程界立法會議員何鍾泰已經七十有三，喺該界別連任多屆，但至今仍未有意思退落嚟。佢早排接受報章訪問時，更豪言工程界裏面「無人夠實力接班」。呢句說話激起佢嘅老對手陸宏廣嘅怒氣，尋日走出嚟開記者會，講明極有可能第三度參選挑戰何鍾泰。
本身係工程師兼大律師嘅陸宏廣，○○年同○四年都曾經挑戰何鍾泰，但最終都鎩羽而歸，兩次都輸成七百票。不過佢尋日就引述業界意見，指對方霸咗個位太耐，係時候換人做吓，又話政府近年推出嘅基建工程量唔平均，業界好多怨言，如果佢協調到業界冇其他人出戰，一對一佢贏面相當高喎。
講開協調，有傳屢敗屢戰嘅陸宏廣之所以冇喺○八年參選，係因為當年有泛民嘅黎廣德挑戰何鍾泰，阿爺擔心陸宏廣會分薄建制派嘅票源，令黎廣德漁人得利，因此將佢勸退。陸宏廣尋日被問及會否擔心又被勸退時，笑笑口話唔識答咁敏感嘅問題。